Настани / Новости

Груевски: Врвната литература ќе помогне да се иницира напредок 

Дванaесет нови наслови од капиталниот проект на Владата за превод на 1000 стручни научни книги од кои се учи на десетте врвни универзитети во светот беа промовирани денеска во присуство на претседателот на Владата на Република Македонија Никола Груевски и министерот за образование Спиро Ристовски.

Министерот Ристовски посочи дека проектот „Превод на 1000 стручни, научни книги и учебници од кои се учи на врвните, најдобрите и најреномираните универзитети во САД и Англија, а од областа на правото во Франција и Германија“ е една многу значајна инвестиција започната пред неколку години, како дел од искрените заложби изразени преку бројните проекти, активности и реформи на Владата на Република Македонија за унапредување и создавање на современ и конкурентен образовен систем.

- Луѓето во Македонија сакаат да се образоваат, да читаат и да го прошируваат знаењето и токму затоа како институции водиме посебна политика кон образованието, во која тоа нема третман на потрошувач како во некои други времиња, туку третман на двигател на општествениот развој. Тоа е инвестиција која што на долг рок дава повеќедименсионален ефект, се разбира позитивен, како за оној кој поседува богато знаење, така и за околината, за компанијата или институцијата во којашто работи и придонесува и конечно за државата во целост, посочи министерот Ристовски.

Како што рече, со повеќе од 80 проценти реализираност, овој проект ќе продолжи да се имплементира до крајот на годината кога се очекува целосно да биде заокружен.

Премиерот Груевски информираше дека досега, имајќи ги во предвид и денешните 12 нови наслови бројот на книги и учебници кои што се преведени, испечатени и дистрибуирани до универзитетите се искачи на 821 наслов.

-Преку овој проект низ годините кои поминаа реализиравме поголем број промоции и со голем број на книги преку кои македонското општество се стекна со илјадници страници на врвна светска литература од сите области и од сите научни полиња, посочи тој и нагласи дека овој проект претставува една од најголемите инвестиции кои што досега биле спроведени во Македонското образовнието во сите изминати години.

Тој потенцираше дека преку овој проект книгите кои што го претставуваат врвот на светската научна мисла стануваат лесно достапни и во Македонија и напомена дека оваа литература се повеќе е прифатена во Универзитетите во Македонија.

- Капиталот на знаење кој преку овој проект денес влегува во Македонското општество помеѓу македонската младина, помеѓу македонските научници е капитал кој ќе има повеќекратни и долгогодишни ефекти за Македонија. Врвната литература ќе помогне да се иницира напредок во многу научни полиња и да се изградат врвни кадри во Македонија кои пак ќе треба да ја повлечат и својата земја и да го забрзаат нејзиниот развој, посочи премиерот.

Тој уште еднаш апелираше овие учебници и книги да се користат како прв учебник на Универзитетите во Македонија, затоа што како што нагласи, игнорирањето од страна на одредени професори на врвната научна мисла претставува игнорирање на самата наука што тие ја промовираат, ја предаваат пред студентите и сметаат дека е многу значајна.  

Извор: www.kurir.mk