Настани / Новости

Медицинскиот факултет во Скопје ја збогати својата библиотека со нови 15 наслови од проектот на Владата за превод и печатење на 1.000 стручни книги од кои се учи на најреномираните универзитети во светот. Факултетот сега  располага со 57 изданија на македонски и на албански јазик

Основи на оториноларингологија, Клиничка анестезиологија, Меритова неврологија, Администрација на јавното здравство, Клиничка гинеколошка онкологија... се меѓу новите наслови и со нив, од почетокот на проектот (јануари 2009), досега се преведени и дистрибуирани 577 книги.

- Се работи за книги кои се користат на највисоко рангираните универзитети, напишани од автори кои во моментов имаат најсовремени научни достигнувања, кои се најценети и највисоко платените професори од различни области на медицината и се доктори на најпознати медицински центри во светот.

Нивното знаење и искуство може да се пренесе кај нашите студенти, научни работници, докторанди и професори, рече премиерот Никола Груевски кој на 34-тата промоција во овој проект беше со министрите за образование и наука и за здравство, Панче Кралев и Никола Тодоров.

Тој ги повика професорите да ја почитуваат врвната и актуелна научна мисла и овие учебници да ги користат како примарна, а не како дополнителна и помошна литература.

Претседателот на Владата рече и дека ќе продолжат инвестициите во  здравството и проектот за изградба и реновирање на клиниките, болниците и другите јавни здравствени установи.

Министерот Кралев рече дека со проектот значајно се унапредува образовниот систем во Македонија, а со преводот на медицински книги и едукација на лекарите се подобрува здравствениот систем. Додаде дека двете се зависни едно од друго.

- Колку понизок степен на образование, толку повисока застапеност на болести.... Добрата едукација во здравството се однесува превенствено на лекарите. Што подобра стручна и научна наобразба на лекарите, тоа поквалитетно здравство, истакна Кралев.

За новата тура наслови и четврта промоција на  Медицинскиот факултет, се заблагодари деканот Никола Јанкуловски. Тој истакна дека добрата дијагностика и третманот на пациентите зависи од многу фактори, но пред се од знаењето и вештините на медицинскиот персонал.

Извор: Курир

Повеќе на: http://kurir.mk/makedonija/vesti/65327-Promovirani-15-naslovi-od-medicinskite-nauki